من حضنك تبدأ الحكايه
بقلم الكاتبه/رانيا عصمت كامل
اخصائيه علم النفس
من حضنك تبدأ الحكاية
أو تنتهى
لو ابنك أو بنتك فى سن المراهقة أو الطيب
حاول تقرب منهم تصاحبهم وتكون السند ليهم قبل أى حد غريب.
خليهم يلاقوك أول اختيار
مش آخر حل بعد ما الدنيا تقفل فى وشهم.
الغى التخويف
-------------------------------
الخوف بيعمل مسافات وبيخلق أسرار مش طاعة
الغى فرض الرأى
لأن الرأى لما بيتفرض بيتقابل بعند حتى لو هو صح.
اتكلم
اسمع
ناقش
من غير ما تحسسهم إنك الأعلى وهم الأقل
خلي الحوار بينكم مفتوح
مش تحقيق
خليهم يحسوا إن صوتهم مهم
وإن ليهم حق يختاروا، حتى لو اختياراتهم مش دايمًا صح
بس خلى عندك توازن
قربك منهم مش معناه تسيب الحبل على الغارب
ولا إنك توافق على كل حاجة
فى فرق بين الاحتواء والتسيب
بين الصداقة والتفريط.
علمهم الصح
بس بهدوء
وجههم بس بحب
-------------------------------
حط حدود
بس من غير قسوة
اقعد معاهم حتى فى التفاصيل الصغيرة
اسألهم عن يومهم
أصحابهم
اللى بيحبوه
واللى مضايقهم
التفاصيل دى هى اللى بتبنى الثقة الكبيرة
وإوعى تقلل من مشاكلهم
حتى لو شايفها بسيطة هى بالنسبالهم كبيرة.
لما تستهون بيها هما هيستهونوا بالكلام معاك.
فاكر نفسك زمان
-------------------------------
كنت محتاج حد يسمعك
مش حد يحاسبك
هما كمان كده بالظبط
خليهم يحسوا إنك أمان
مش رقابة
حضن
مش تهديد
سند
مش ضغط
ولما يغلطوا
وده طبيعى هيغلطوا
ما تكسّرش فيهم ولا تفضحهم ولا تعايرهم.
احتويهم وعلّمهم يقوموا تانى
لأنك فى الآخر
-------------------------------
مش هتقدر تمنعهم يغلطوا
بس تقدر تخليهم يرجعوا لك
بعد كل غلطة
وده هو الفرق
بين ابن بيستخبى من أهله
وابن بيجرى عليهم
بقلم الكاتبه/
أ/رانيا عصمت كامل
اخصائيه علم النفس
تعليقات
إرسال تعليق