الخيانه العاطفيه
بقلم الكاتبه/ هاله جاد
استشاري نفسي واسري
الخيانه العاطفية تبدأ برسالة
بسؤال بسيط مالك ؟شكلك زعلان أنتي تستاهلي حد يقدرك
أنت راجل مختلف عن غيرك
يعني ايه الخيانه العاطفية ؟يعني فضفضه لحد غريب عن مشاكلك مع شريك حياتك يعني تحكي له أسرار بيتك يعني تضحك معاه من قلبك يعني تبقى مستني اشعار منه وهنا المشكله المشكلة فى التعلق
------------------------------
الخيانه العاطفيه
بقلم الكاتبه/ هاله جاد
استشاري نفسي واسري
الزوجه لما تكتشف أن جوزها بيدي اهتمامه لست تانيه حتى لو بيقول دى مجرد صديقه هي مبتزعلش من الصداقة هي بتنكسرمن فكره أن عنده حنيه وادها لغيرها والزوج لما يكتشف أن مراته بتشكي لراجل تاني بيحس أنه اتسحب من دوره من رجولته من خصوصيته طيب ليه ده بيحصل علشان بننسى أن الزواج رعاية يومية كلمه حلوه نظره تقدير لمسه طبطبه سؤال صادق من القلب لما الحاجات دي تختفى القلب بيدور علي بديل مش عشان الشخص سئ لكن عشان الإنسان بطبيعته محتاج احتواء
-----------------------------
الخيانه العاطفيه
بقلم الكاتبه/ هاله جاد
استشاري نفسي واسري
خليني اقول الاهتمام اللي بيتزرع بره بيسحب جذور العلاقه من جوه ماتقولش أنا مسيطر المشاعر مش لعبه اللي يبدأ هزار ممكن ينتهي تعلق واللي يبدأ تعاطف ممكن ينتهي حب مزيف
ولوحصلت خيانه عاطفيه
أول خطوة اعتراف بدون تبرير ماتقولش أصل أنتي مهمله أصل أنت مش مهتم الخيانه اختيار تاني خطوه قطع العلاقه تماما مش نفضل صحاب اللي عايز بيته يقفل الباب بايده تالت خطوه أعاده بناء الثقة والثقه مابترجعش بكلمه سامحيني بترجع بمواقف
رساله لكل زوج زوجتك لماتحس أنها جميلة في عينك مش هتدور علي عين تانيه تشوفها
-----------------------------
الخيانه العاطفيه
بقلم الكاتبه/ هاله جاد
استشاري نفسي واسري
ورسالة لكل زوجه جوزك لما تحسسيه أنه سند ومهم مش هيحتاج يسمع ده من حد غريب أوعو تستهينو بالكلمه أوعو تستهينو بالرسالة اوعو تستهينوبالاهتمام البيوت مابتتهدش فجأة بتتهد تدريجيا لما القلب يهجر واحنا ساكتين وفي النهاية لو عندك طاقه حب حطها في بيتك لو عندك اهتمام اديه لشريك حياتك ولو حسيت بفراغ اتكلم ماتهربش علشان اللي بينكو أكبر من أى رساله واغلي من أي اعجاب وأصدق من أي اهتمام مؤقت
بقلم الكاتبه/
أ/هاله جاد
استشاري نفسي واسري
تعليقات
إرسال تعليق